Tuesday, January 30, 2018

"ಕೊರಲ್ ಬ್ಲೀಚಿಂಗ್"

ಹೀಗೆ ಅಂತರ್ಜಾಲದಲ್ಲಿ ಸುತ್ತುವಾಗ ನಾನು ನೋಡಿದ ಒಂದು ಚಿತ್ರ ಮನಸ್ಸಿಗೆ ಬಹಳ ಬೇಸರವನ್ನು ತಂದೊಡ್ಡಿತು.ಈ ಬಗ್ಗೆ ಒಂದಷ್ಟು ಬರೆಯಬೇಕೆನ್ನಿಸಿ ಬರೆದಿದ್ದೇನೆ
ಮೇಲೆ ಇರುವ ಚಿತ್ರ 2017 ರಲ್ಲಿ ನಡೆದ (ಈಗಲೂ ನಡೆಯುತ್ತಿರುವ )ಕೊರಲ್ ಬ್ಲೀಚಿಂಗ್ ಎಂಬ ಕೊರಲ್ ಗಳ ದಾರುಣ ಕತೆಯ ಬಗ್ಗೆ

ನೀವೆಲ್ಲಾ ಎನ್ ಜಿ ಸಿ ಅನಿಮಲ್ ಪ್ಲಾನೆಟ್ ಚಾನೆಲ್ ಗಳಲ್ಲಿ ಸಮುದ್ರಗಳಲ್ಲಿ ಇರುವ ಅತ್ಯಂತ ಬಣ್ಣ ಬಣ್ಣಗಳಿಂದ ಕುಡಿದ ಹವಳದ ಬಂಡೆಗಳನ್ನು ನೋಡಿರಬಹುದು.ಇವುಗಳೇ ಕೊರಲ್ ರೀಫ್. ಈ ಕೊರಲ್ ರೀಫ್ ಇರುವಲ್ಲಿ ಸಾವಿರಾರು ಜಾತಿಯ ಕಣ್ಮನ ತಣಿಸುವ ಜೀವಿಗಳು ವಾಸಿಸುತ್ತವೆ.

ಏನಿದು ಕೊರಲ್ ರೀಫ್ ??
ಸಮುದ್ರಗಳಲ್ಲಿ ವಾಸಿಸುವ ಜೀವಿ. ಪ್ರತೀ ಕೊರಲ್ ಕೂಡ ಹಲವಾರು ಪಾಲಿಪ್ ಎಂದು ಕರೆಯಲ್ಪಡುವ ಜೀವಿಗಳಿಂದ ಮಾಡಲ್ಪಟ್ಟದ್ದಾಗಿರುತ್ತದೆ. ಈ ಪಾಲಿಪ್ ಗಳು calcium carbonate ಸ್ರವಿಸಿ ರಕ್ಷಣೆಗೆ ಶೆಲ್ ಗಳನ್ನು ನಿರ್ಮಿಸಿ ದಿಬ್ಬಗಳ ಆಕಾರ ನೀಡಿರುತ್ತದೆ ( ಕೊರಲ್ ಗಳಲ್ಲಿ ಮತ್ತೆ ಹಲವು ಬಗೆಗಳಿವೆ) ಈ ಕೊರಲ್ ಗಳಲ್ಲಿ ವಾಸಿಸುವ zooxanthellae ಎಂಬ ಆಲ್ಗೆಯಿಂದ ಕೂಡಾ ಇವು ಆಹಾರವನ್ನು ಪಡೆಯುತ್ತವೆ.ಸಮುದ್ರದ ಭಾಗದ ಕೇವಲ 1 ಪ್ರತಿಶತ ಇದ್ದರೂ ಕೂಡಾ ಇಡೀ ಸಾಗರ ಪರಿಸರ ವ್ಯವಸ್ಥೆಯ 25 ಪ್ರತಿಶತ ಜೀವಿಗಳು ಈ ಕೊರಲ್ ರೀಫ್ ಗಳಲ್ಲಿ ಕಂಡುಬರುತ್ತದೆ. ಇದಕ್ಕಾಗಿಯೇ ಇವುಗಳನ್ನು ಸಾಗರದ ಮಳೆಕಾಡು ಎನ್ನಬಹುದು
  
ಏನಿದು ಬ್ಲೀಚಿಂಗ್
 ಸಾಗರದ ನೀರಿನ ಉಷ್ಣಾಂಶ ಕೆಲವೇ ಕೆಲವು ಡಿಗ್ರಿ ಸೆಲ್ಸಿಯಸ್ ಹೆಚ್ಚಾದರೂ ಕೂಡ ಕೊರಲ್ ಗಳು ತಮ್ಮಲ್ಲಿರುವ zooxanthellae ಆಲ್ಗೆಯನ್ನು ಕಳೆದುಕೊಳ್ಳುತ್ತವೆ. ಆಗ ಈ ಕೊರಲ್ ಗಳು ಬಿಳುಚಿಕೊಳ್ಳುತ್ತವೆ.ಇದನ್ನೇ ಕೊರಲ್ ಬ್ಲೀಚಿಂಗ್ ಎನ್ನುತ್ತೇವೆ. ದೀರ್ಘಾವಧಿ ಉಷ್ಣಾಂಶ ಹೆಚ್ಚಿದ್ದಲ್ಲಿ ( ಜಾಗತಿಕ ತಾಪಮಾನ ಹೆಚ್ಚಳದ ಪರಿಣಾಮ )ಕೊರಲ್ ಗಳು ನಾಶ ಹೊಂದುತ್ತವೆ. ಕೊರಲ್ ಬ್ಲೀಚಿಂಗ್ ಸಾಗರಗಳಲ್ಲಿ ಹೊಸದೇನಲ್ಲ ಆದರೆ 1980ರ ನಂತರ ವರ್ಷಗಳಲ್ಲಿ ಬ್ಲೀಚಿಂಗ್ ಸುಮಾರು 5 ರಿಂದ 6 ಪಟ್ಟು ಹೆಚ್ಚಳವನ್ನು ಕಂಡಿದೆ. ಬ್ಲೀಚಿಂಗ್ ಅದ ಕೊರಲ್ ಗಳು ಸಾಯಲೇ ಬೇಕೆಂದು ಇಲ್ಲ ಉಷ್ಣಾಂಶ ಇಳಿಕೆಯಾದಲ್ಲಿ ಇವು ಚೇತರಿಸಿಕೊಳ್ಳುತ್ತವೆ..ಆದರೆ ಇತ್ತೀಚಿನ ವರ್ಷಗಳಲ್ಲಿ ಅವುಗಳ ಚೇತರಿಕೆಗಿಂತ ವೇಗವಾಗಿ ಬ್ಲೀಚಿಂಗ್ ನಡೆಯುತ್ತಿರುವುದು ಆತಂಕಕಾರಿ ಸಂಗತಿ.
 ಆಸ್ಟ್ರೇಲಿಯಾದ 2600 ಮೈಲಿ ವಿಸ್ತೀರ್ಣದ ದ ಗ್ರೇಟ್ ಬ್ಯಾರಿಯರ್ ರೀಫ್ ಹಿಂದೆಂದೂ ಕಾಣದ ಬ್ಲೀಚಿಂಗ್ ಅನುಭವಿಸಿದೆ. ಕೆಲವು ವಿಜ್ನ್ಯಾನಿಗಳ ಪ್ರಕಾರ ಈ ಶತಮಾನದ ಕೊನೆಯ ಹೊತ್ತಿಗೆ ಕೊರಲ್ ಗಳು ಸಾಗರಗಳಿಂದ ಕಣ್ಮರೆಯಾಗಲಿದೆ ಎಂಬ ಆತಂಕಕಾರಿ ಅಂಶ ಹೊರಬಿದ್ದಿದೆ. ಕೊರಲ್ ರೀಫ್ ಗಳು ನಾಶವಾದರೆ ಆ ಪರಿಸರ ವ್ಯವಸ್ಥೆಯನ್ನೇ ನೆಚ್ಚಿಕೊಂಡ ಸಾವಿರಾರು ಜೀವ ಪ್ರಭೇದಗಳಿಗೆ ಆಹಾರಕ್ಕೆ ಸಂತಾನೋತ್ಪತ್ತಿ ಗೆ ಕುತ್ತು ಬೀಳುತ್ತದೆ.ಅವುಗಳ ಭವಿಷ್ಯ ಅಂತಂತ್ರದತ್ತ ಸಾಗಿ ಭೂಮಿಯಿಂದಲೇ ಕಣ್ಮರೆಯಾಗಬಹುದು. ಕೊರಲ್ ರೀಫ್ ಗಳು ನಾಶವಾದಲ್ಲಿ ಅದು ಮೀನುಗಾರಿಕೆಯ ಮೇಲೆ ದೊಡ್ಡ ಹೊಡೆತ ನೀಡಿ ಮಾನವ ಸಮಾಜದ ಮೇಲೆ ಹತ್ತು ಹಲವು ಋಣಾತ್ಮಕ ಪರಿಣಾಮ ಬಿರುವುದರಲ್ಲಿ ಸಂದೇಹವಿಲ್ಲ.ಸಾಗರ ಮಾಲಿನ್ಯ ಕೂಡಾ ಕೊರಲ್ ಬ್ಲೀಚಿಂಗ್ ಉಂಟು ಮಾಡಬಹುದು - ಆರೋಗ್ಯಕರ ಕೊರಲ್ ರೀಫ್ ಗಳು ಆರೋಗ್ಯಕರ ಸಾಗರ ಪರಿಸರ ವ್ಯವಸ್ಥೆಯನ್ನು ಬಿಂಬಿಸುತ್ತವೆ

ಸಾಗರಗಳು ಬಹು ವಿಸ್ತೀರ್ಣದ ಭಾಗಗಳು ಹಾಗೂ ಅದರ ಜೀವಿಗಳಿಗೆ ಮಾನವನಿಂದ ಏನೇ ತೊಂದರೆ ಉಂಟಾಗುವುದಿಲ್ಲ ಎಂಬ ಕಲ್ಪನೆ ಸುಳ್ಳು. ಇಂದು ಸಾಗರ ಪರಿಸರ ವ್ಯವಸ್ಥೆಯ ಮೇಲೆ ಮಾನವನ ಹಸ್ತಕ್ಷೇಪ ಎಷ್ಟಿದೆ ಎನ್ನುವುದಕ್ಕೆ ಕೊರಲ್ ಗಳ ದಾರುಣ ಕತೆಯೇ ಸಾಕ್ಷಿ

ಮೇಲೆ ಕಾಣುವ ಚಿತ್ರದಲ್ಲಿ ಪರ್ಪಲ್ ಬಣ್ಣದಲ್ಲಿ ಕಾಣುತ್ತಿರುವುದು ಕೊರಲ್ ಬ್ಲೀಚಿಂಗ್ ಆತಂಕಕಾರಿ ಮಟ್ಟವನ್ನು ತಲುಪಿ ಕೊರಲ್ ಗಳು ಸಾಯಬಹುದಾದ ಪರಿಸ್ಥಿತಿಯನ್ನು ತೋರಿಸುತ್ತದೆ ಸೂಚಿಸುತ್ತದೆ. ರೆಡ್ ಕಲರ್ ನಲ್ಲಿ ಕಾಣುತ್ತಿರುವುದು ಕೂಡಾ ಬ್ಲೀಚಿಂಗ್ ಆಗುತ್ತಿರವ ಕೊರಲ್ ರೀಫ್ ಗಳು. ಜಾಗತಿಕ ತಾಪಮಾನ ಇಳಿಕೆಯಾಗದ ಹೊರತು ಕೊರಲ್ ಗಳ ಉಳಿವನ್ನು ಸಮರ್ಥಿಸಲು ಸಾಧ್ಯವಿಲ್ಲವೆಂದೆನ್ನಿಸುತ್ತದೆ

Data Courtesy - NOAA
Coral images courtesy - Internet

Monday, March 14, 2016

ಅಬ್ಬಬ್ಬಾ ಇದೆಂತಹಾ ಸೆಖೆ....

ಅಬ್ಬಬ್ಬಾ ಇದೆಂತಾ ಸೆಖೆ..ಹಿಂದೆಂದಿಗಿಂತಲೂ ಸಹಿಸಲಸಾಧ್ಯವಾದ ಸೆಖೆ..ಎಂತಾ ಬಿಸಿಲು..ಒಂದು ಮಳೆಯಾದರೂ ಬರಬಾರದೇ...! ಹೀಗೆ ಮಾತನಾಡುತ್ತಾ ಇದೇ ಸಮಯದಲ್ಲಿ ಕರೆಂಟ್ ತೆಗುವುವವರಿಗೆ ಒಂದಷ್ಟು ಹಿಡಿ ಶಾಪ ಹಾಕುತ್ತಿರುವ ದೃಶ್ಯ ಸರ್ವೇ ಸಾಮಾನ್ಯವಾಗಿದೆ

.ಇಂತಹ ಮಾತುಗಳನ್ನು ಕೇಳಿದಾಗ ನನಗನ್ನಿಸುವುದು ಜನಗಳು ಸಮ್ಮನೆ ಸೆಖೆ ,ಮಳೆ ಎನ್ನುತ್ತಾರೆಯೇ ವಿನಃ ಇಂತಹ ಹವಾಮಾನ ವೈಪರೀತ್ಯದ ಮೂಲಗಳ ಬಗ್ಗೆ ತಲೆಕೆಡಿಸಿಕೊಳ್ಳುವುದೇ ಇಲ್ಲವಲ್ಲವೆಂದು 

.ಹೌದು ಬೇಸಿಗೆ ಬಂತೆಂದರೆ ಇಂತಹ ಮಾತುಗಳನ್ನು ನಾವು ಕೇಳುವುದು ಸಹಜವೇ..ಅದರಲ್ಲಿ ವಿಶೇಷವೇನು ಇಲ್ಲ ಬಿಡಿ ಅನ್ನುತ್ತಿರಾ... ಇದೆ ಖಂಡಿತವಾಗಿಯೂ ವಿಶೇಷವಿದೆ

.ಇತ್ತೀಚಿನ ವರ್ಷಗಳ ಬೇಸಿಗೆಗಳು ಹಿಂದೆಂದಿಗಿಂತಲೂ ಹೆಚ್ಚು ಉಷ್ಣತೆಯನ್ನು ಹೊಂದುತ್ತಿರುವುದಲ್ಲದೇ ಸಹಿಸಲು ಅಸಾಧ್ಯವಾದ ಪರಿಸ್ಥಿತಿಯನ್ನು ತಂದಿರುವುದರಲ್ಲಿ ಸಂಶಯವಿಲ್ಲ

.ನೀವೀ ಲೇಖನವನ್ನು ಆಫೀಸ್ ನ ಹವಾ ನಿಯಂತ್ರಿತ ಕೊಠಡಿಯಲ್ಲಿ ಕುಳಿತು ಓದುತ್ತಿರುವುದಾದರೆ ನಾನು ಹೇಳಿದ ಮಾತು 'ಹೌದಾ' ಎಂದೆನಿಸಬಹುದು .ಆದರೆ ಸ್ವಲ್ಪ ಹೊರ ಬಂದು ಬಿಸಿಲಿಗೆ ಮೈ ಒಡ್ಡಿ ನಿಂತುಕೊಳ್ಳಿ...ನಾನು ಹೇಳುತ್ತಿರುವ ಉರಿ ಭೇಸಿಗೆಯ ಅನುಭವ ಕೆಲವೇ ನಿಮಿಷಗಳಲ್ಲಿ ನಿಮಗೆ ಉಂಟಾಗುತ್ತದೆ

.ನಮ್ಮ ಶಿವಮೊಗ್ಗದಲ್ಲೇ ಒಂದು ವಾರದ ಹಿಂದೆ ದಾಖಲಾದ 40 ಡಿಗ್ರೀ ಉಷ್ಣಾಂಶ ಇಲ್ಲಿಯವರನ್ನು ಒಮ್ಮೆ ತಬ್ಬಿಬ್ಬು ಮಾಡಿದ್ದು ಸುಳ್ಳಲ್ಲ

.ನೀವು ಮಲೆನಾಡಿನವರು ಪುಣ್ಯವಂತರು (ಹವಾಮಾನದ ಆಧಾರದ ಮೇಲೆ)  ಅನ್ನುವ ಮಂದಿ ಈ ಸಮಯದಲ್ಲಿ ಮಲೆನಾಡಿನಲ್ಲೂ ಕೂಡ ಅಬ್ಬಬ್ಬಾ ಏನಿದು ಸೆಖೆ ಮಲೆನಾಡೂ ಕೂಡ ಬಯಲುಸೀಮೆಯಂತಾಗಿದೆ ಎನ್ನುವುದನ್ನು ನಾನು ಕೇಳಿಸಿಕೊಂಡಿದ್ದೇನೆ

.ಹೌದು ಉಷ್ಣಾಂಶದ ಮಟ್ಟ ದಿನೇ ದಿನೇ ಏರಿಕೆಯಲ್ಲಿ ಸಾಗಿದ್ದು ದಂಗು ಬೀಳಿಸುವ ಸೆಖೆ ಎಲ್ಲೆಡೆ ಶುರುವಾಗಿದೆ

.ನಾನು  ಎನನ್ನು ಹೇಳಲು ಹೊರಟಿದ್ದೀನಿ ಎಂದು ನೀವು ಕೇಳಬಹುದು...! ಸುಮ್ಮನೆ ಯೋಚನೆ ಮಾಡಿ ಇತ್ತೀಚಿನ ವರ್ಷಗಳಲ್ಲಿ ಈ ಬೇಸಿಗೆ ಚಳಿ ಮಳೆಗಾಲವೆನ್ನುವುದು ಹಿಂದೆಲ್ಲಾ ಇದ್ದಂತೆ ನಿಗದಿತ ತಿಂಗಳುಗಳಲ್ಲಿ ಸಮಯಕ್ಕೆ ಸರಿಯಾಗಿ ನಡೆಯುತ್ತಿದೆಯೇ.... ನನ್ನ ಪ್ರಕಾರ ಇಲ್ಲ..ಎಲ್ಲೋ ಒಂದು ಕಡೆ ಸೂಕ್ಷವಾಗಿ ಗಮನಿಸಿದರೆ ಇವುಗಳ ಚಕ್ರದಲ್ಲಿ ಏನೋ ವ್ಯತ್ಯಾಸವಾದಂತೆ ಅನ್ನಿಸುತ್ತದೆ

.ಇದಕ್ಕೆ ಕಾರಣವನ್ನು ಹುಡುಕುತ್ತಾ ಹೊರಟರೆ ನಮಗೆ ಸಿಗುವ ಉತ್ತರ 'ಜಾಗತಿಕ ತಾಪಮಾನ ಹೆಚ್ಚಳ'

.ಜಾಗತಿಕ ತಾಪಮಾನ ಹೆಚ್ಚಳ ಸಮಸ್ಯೆಗೆ ಕಾರಣವಾದ ಪ್ರಮುಖ ಅನಿಲ ಇಂಗಾಲದ ಡೈ ಆಕ್ಸೈಡ್. ಹಾಗೆ ನೋಡಿದರೆ ಇಂಗಾಲದ ಡೈ ಆಕ್ಸೈಡ್ ಅನಿಲ ಭೂಮಿಯ ವಾತಾವರಣಕ್ಕೆ ಅಗತ್ಯವಿರುವ ಅನಿಲ. ಭೂಮಿಯಿಂದ ಪ್ರತಿಫಲಿಸಲ್ಪಟ್ಟ  ಕಿರಣಗಳಲ್ಲಿ ಕೆಲವನ್ನು ಭೂಮಿಗೆ ಪುನಃ ಕಳಿಸುವುದರ ಮುಖಾಂತರ ಭೂಮಿಯ ಉಷ್ಣತೆಯನ್ನು ನಿಯಂತ್ರಿಸುವುದರಲ್ಲಿ ಈ ಅನಿಲ ಪ್ರಮುಖ ಪಾತ್ರವನ್ನು  ವಹಿಸುತ್ತದೆ. ಈ ಅನಿಲದ ಪ್ರಮಾಣ ತೀರಾ ಕಡಿಮೆ ಇದ್ದಾಗ ಭೂಮಿಯ ಉಷ್ಣಾಂಶ ಕಡಿಮೆಯಾಗಿ ಹಿಮಯುಗಗಳು ಸಂಭವಿಸಿದ್ದು ನಮಗೆ ಗೊತ್ತಿರುವ ವಿಚಾರವೇ

.ಆದರೆ ಇಂದು ಆಗಿರುವ ಸಮಸ್ಯೆಯೆಂದರೆ ಮಾನವ ಇಂದು ಯಾವ ಪ್ರಮಾಣದಲ್ಲಿ ಇಂಗಾಲದ ಡೈ ಆಕ್ಸೈಡ್  ಅನ್ನು ವಾತಾವರಣಕ್ಕೆ ಸೇರಿಸುತ್ತಿದ್ದಾನೆಂದರೆ ಭೂಮಿಯಿಂದ ಪ್ರತಿಫಲನಗೊಂಡ ಬಹುಭಾಗ ಕಿರಣಗಳನ್ನು ಈ ಅನಿಲ ಹಾಗು ಇತರ ಹಸಿರುಮನೆ ಅನಿಲಗಳು (ಮಿಥೇನ್ , ನೈಟ್ರಸ್ ಆಕ್ಸೈಡ್ ಇತ್ಯಾದಿ)  ಭೂಮಿಗೆ ವಾಪಸ್ ಕಳಿಹಿಸುತ್ತಿರುವುದರಿಂದ ಭೂಮಿಯ ತಾಪಮಾನ ಏರಿಕೆಯಾಗುತ್ತಲೇ ಸಾಗಿದೆ.ಇದನ್ನೇ ನಾವು ಜಾಗತಿಕ ತಾಪಮಾನ ಏರಿಕೆ ಎಂದು ಕರೆಯುತ್ತಿರುವುದು 

.ಜಾಗತಿಕ ತಾಪಮಾನ ಏರಿದರೆ ಎರಲಿ ಅದರಿಂದ ಹೆಚ್ಚೆಂದರೆ ಭೇಸಿಗೆಯ ಬಿಸಿ ಜಾಸ್ತಿಯಾಗಬಹುದು ಅಷ್ಟೇ ತಾನೇ ಎಂದುಕೊಂಡರೆ ತಪ್ಪಾದೀತು. ಜಾಗತಿಕ ತಾಪಮಾನದ ಪರಿಣಾಮಗಳು ಹಲವು 

.ತೀರಾ ಸರಳವಾಗಿ ಹೇಳುವುದಾದರೆ 2015  ರಲ್ಲಿ ನಮ್ಮ ದೇಶದಲ್ಲಿ ಮಾನ್ಸೂನ್ ಕೈ ಕೊಟ್ಟಿತ್ತು. ಇದಕ್ಕೆ ಕಾರಣವನ್ನು ಹುಡುಕುತ್ತಾ ಹೋದಾಗ ನಮಗೆ ಸಿಗುವ ಉತ್ತರ ಎಲ್ ನಿನೋ ಎನ್ನುವ ಸಮುದ್ರದಲ್ಲಿ ನಡೆಯುವ ಕ್ರಿಯೆ. ಸಮುದ್ರದ ನೀರಿನ ಉಷ್ಣತೆಯಲ್ಲಿ ಏರಿಕೆಯಾಗುವ ಕ್ರಿಯೆಯೇ ಈ ಎಲ್ ನಿನೋ . ಭೂಮಿಯ ಹವಾಮಾನವನ್ನು ನಿಯಂತ್ರಿಸುವುದರಲ್ಲಿ ಸಮುದ್ರಗಳ ಪಾತ್ರ ತುಂಬಾ ಮಹತ್ವದ್ದು . ಸಾಗರಗಳ ಉಷ್ಣತೆ ಜಾಸ್ತಿಯಾಗುತ್ತಾ ಹೋದಂತೆ ಇದು ಹಲವು ಕಡೆ ಪ್ರವಾಹವನ್ನು ಸೃಷ್ಟಿಸಿದರೆ ಇನ್ನೂ ಹಲವೆಡೆ ಬರಗಾಲವನ್ನು ಸೃಷ್ಟಿಸಬಹುದು. ಇಂದು ಭೂಮಿಗೆ ಅಪ್ಪಳಿಸುತ್ತಿರುವ ಶಕ್ತಿಶಾಲಿ ಚಂಡಮಾರುತಗಳ ಸೃಷ್ಟಿಗೆ ಕಾರಣವೇ ಸಾಗರಗಳ ನೀರಿನ ಉಷ್ಣತೆಯಲ್ಲಿ ಏರಿಕೆ ಉಂಟಾಗುವುದು 

.ಹಿಂದೆಂದಿಗಿಂತಲೂ ಹೆಚ್ಚಿನ ಪ್ರಮಾಣದಲ್ಲಿ ಅರ್ಕಟಿಕ್ ನಲ್ಲಿ ಕರಗುತ್ತಿರುವ ಹಿಮದ ಹಿಂದೆ  ಇರುವ ಅಪರಾಧಿ ಈ ತಾಪಮಾನ ಏರಿಕೆ . ಜಗತ್ತಿನ ಹಲವೆಡೆ ಸಮುದ್ರ ಮಟ್ಟದಲ್ಲಿ ಏರಿಕೆಯಾಗುತ್ತಿರುವುದು ಈ ವೇಗವಾಗಿ ಹಿಮಕರಗುವ ಪ್ರಕ್ರಿಯೆಯಿಂದ 

.ನಾವು ಇಲ್ಲಿ ಮಾತನಾಡುತ್ತಿರುವ ಸೆಖೆಗೂ ನಾವು ವಾತಾವರಣಕ್ಕೆ ತುಂಬುತ್ತಿರುವ ಇಂಗಾಲದ ಡೈ ಆಕ್ಸೈಡ್ ಗೂ ಖಂಡಿತಾ ಸಂಭಂದವಿದೆ

.ಕಳೆದ ನೂರಾರು,ಸಾವಿರಾರು ವರ್ಷಗಳಿಗಿಂತಲೂ ಹೆಚ್ಚು ಪ್ರಮಾಣದಲ್ಲಿ ನಾವು ಈ ಅನಿಲವನ್ನು ವಾತಾವರಣಕ್ಕೆ ಸೇರಿಸುತ್ತಿದ್ದೇವೆ

.ಕೆಲವೇ ದಿನಗಳ ಹಿಂದೆ ಪ್ರಕಟಣೆಗೊಂಡ ವರದಿಗಳ ಪ್ರಕಾರ 2015 ರಲ್ಲಿ ಅತ್ಯಂತ ಹೆಚ್ಚು ಪ್ರಮಾಣದ ಇಂಗಾಲದ ಡೈ ಆಕ್ಸೈಡ್ ಅನ್ನು ವಾತಾವರಣಕ್ಕೆ ಸೇರಿಸಲಾಗಿದೆ. ವರ್ಷಕ್ಕೆ 2 ppm ( parts per million) ನಷ್ಟು ವಾತಾವರಣಕ್ಕೆ ಸೇರುತ್ತಿದ್ದ ಇಂಗಾಲದ ಡೈ ಆಕ್ಸೈಡ್ ಪ್ರಮಾಣ ಕಳೆದ 4 ವರ್ಷಗಳಲ್ಲಿ 2 ppm ಗಿಂತಲೂ ಅಧಿಕವಾಗಿ, ಮುಖ್ಯವಾಗಿ 2015 ರಲ್ಲಿ 3.5 ppm (ಕಳೆದ 56 ವರ್ಷದಲ್ಲೇ ವರ್ಷವೊಂದರಲ್ಲಿ ಇಷ್ಟು ಏರಿಕೆಯಾಗಿದೆ)  ನಷ್ಟು ತಲುಪುವ ಮೂಲಖ ವಾತಾವರಣದ ಇಂಗಾಲದ ಡೈ ಆಕ್ಸೈಡ್ ನ ಪ್ರಮಾಣ 402.6 ppm ಕ್ಕೆ ತಲುಪಿದೆ (1880 ರ ಮೊದಲು 280 ppm ನಷ್ಟಿತ್ತು). ಹಲವು ಹವಾಮಾನ ವರದಿಗಳ ಪ್ರಕಾರ 2015 ದಾಖಲೆಯ ಉಷ್ಣಾಂಶ ಏರಿಕೆಯ ವರ್ಷ. ಇದಲ್ಲದೇ ದಾಖಲೆಯಲ್ಲೇ  ಅತ್ಯಂತ ಹೆಚ್ಚು ಪ್ರಮಾಣದ ಇಂಗಾಲದ ಡೈ ಆಕ್ಸೈಡ್ ಹೊಂದಿದ ವರ್ಷ 2015 ಎಂದು ವರದಿಯಲ್ಲಿ ತಿಳಿಸಲಾಗಿದೆ 

.ತೈಲ ಬೆಲೆಯಲ್ಲಿ ಬಾರಿ ಇಳಿಕೆ ಇದಕ್ಕೆ ಕಾರಣವಿರಬಹುದು ಹಾಗು ಸಧ್ಯಕ್ಕೆ ನಡೆಯುತ್ತಿರುವ ಎಲ್ ನಿನೋ ಅಂಶ ಕೂಡ ಇದಕ್ಕೆ ಕಾರಣವೆಂದು ನಂಬಲಾಗಿದೆ. ಎಲ್ ನಿನೋದಿಂದಾಗಿ ಹಲವೆಡೆ ಉಂಟಾದ ಬರಗಾಲ ಹಾಗು ಪ್ರವಾಹ ಪರಿಸ್ಥಿತಿಯಿಂದ ಇಂಗಾಲವು ಕಾಡುಗಳಲ್ಲಿ ಸಂಗ್ರಹವಾಗುವ ಪ್ರಮಾಣ ಕಡಿಮೆಯಾಗಿರಬಹುದು ಎಂದು ನಂಬಲಾಗಿದೆ 

.1998 ರಲ್ಲಿ ಹೀಗೆ 'ಎಲ್ ನಿನೋ ' ಉಂಟಾಗಿದ್ದಾಗಲೂ ಇದೇ ರೀತಿ  ಇಂಗಾಲದ ಡೈ ಆಕ್ಸೈಡ್ ಅತ್ಯಂತ ಹೆಚ್ಚು ಪ್ರಮಾಣದಲ್ಲಿ ಏರಿಕೆಯಾಗಿತ್ತು 

.ಪಳೆಯುಳಿಕೆ ಇಂಧನಗಳ ( ಇಂಗಾಲದ ಡೈ ಆಕ್ಸೈಡ್ ಹೊರಹೊಮ್ಮುವುದರ ಒಂದು ಮುಖ್ಯ ಮೂಲ ) ಸುಡುವಿಕೆ  ಎಗ್ಗಿಲ್ಲದೆ ಸಾಗಿದ್ದು ವರ್ಷದ ಸರಾಸರಿಯಲ್ಲಿ ಸುಮಾರು 10 ಬಿಲಿಯನ್ ಮೆಟ್ರಿಕ್ ಟನ್ ನಷ್ಟು ಇಂಗಾಲದ ಡೈ ಆಕ್ಸೈಡ್ ಇದರಿಂದ ವಾತಾವರಣಕ್ಕೆ ಸೇರುತ್ತಿದೆ 

.ಹಿಂದಿನಂತೆಯೇ ಇತ್ತೀಚಿಗೆ ನಡೆದ Paris Climate Change Conference ನಲ್ಲಿ ವಿಶ್ವದ ಹಲವು ನಾಯಕರು ಇಂಗಾಲದ ಡೈ ಆಕ್ಸೈಡ್ ಪ್ರಮಾಣವನ್ನು ಕಡಿಮೆ ಮಾಡುವ ಪ್ರತಿಜ್ಞೆಯನ್ನು ಮಾಡಿದ್ದರು.ಆದರೆ ಇದು ಎಷ್ಟು ಪ್ರಮಾಣದಲ್ಲಿ ಯಶಶ್ವಿಯಾಗುತ್ತದೋ ಕಾದು ನೋಡಬೇಕಿದೆ 

.ವಾತಾವರಣದಲ್ಲಿ   ಹೆಚ್ಚುತ್ತಿರುವ ಇಂಗಾಲದ ಡೈ ಆಕ್ಸೈಡ್ ಪ್ರಮಾಣ ನಿಜಕ್ಕೂ ಒಂದು ಆತಂಕಕಾರಿ ಸಂಗತಿ. ಇದರ ಬಗ್ಗೆ ಜಾಗೃತಿ ಮೂಡದೇ ಇದ್ದಲ್ಲಿ ದುರಂತದ ದಿನಗಳು ದೂರವಿಲ್ಲ 

.ಕುಳಿತುಕೊಂಡು ಸೆಖೆ ಎಂದು ಕರೆಂಟ್ ನವರಿಗೆ ಬಯ್ಯುವ ,ಮಳೆ ಬರಲಿಲ್ಲವೆಂದು ಕೊರಗುವ ನಾವು ಸಮಸ್ಯೆಯ ಮೂಲವನ್ನು ಅರ್ಥ ಮಾಡಿಕೊಳ್ಳುವುದೇ ಇಲ್ಲ. ಇದನ್ನು ಅರ್ಥ ಮಾಡಿಕೊಂಡು ಇದರ ಬಗ್ಗೆ ಅರಿವು ಮೂಡಿಸಿದರೆ ಮಾತ್ರ ಮುಂಬರುವ ವರ್ಷಗಳಲ್ಲಿ ಇಂತಹ ಹವಾಮಾನ ವೈಪರೀತ್ಯದಿಂದ ಪರಾಗಬಹುದೇ ವಿನಃ , ಕಲಿಯುಗವೇ ಹೀಗೆ ಎಂದುಕೊಂಡು ಪರಿಸರ ರಕ್ಷಣೆಯಲ್ಲಿ  ಮತ್ತಷ್ಟು ಬೇಜಾವಾಬ್ದಾರಿತನವನ್ನು ತೋರಿಸಿದಲ್ಲಿ ಬೇಸಿಗೆ,ಚಳಿಗಾಲ,ಮಳೆಗಾಲ ಎನ್ನುವ ಬದಲು  ಬರಗಾಲ,ಪ್ರವಾಹ ಕಾಲ , ಉಷ್ಣಾಂಶ ಮಿತಿ ಮೀರಿದ ಕಾಲ ಎಂದು ಕರೆಯಬೇಕದಿತೇನೋ ......